जालना (रामनगर): जालना तालुक्यातील रामनगर परिसरातून एक अत्यंत धक्कादायक घटना समोर आली आहे. चोरट्यांनी चक्क गॅस एजन्सीचे गोडाऊन फोडून तब्बल ११० गॅस सिलिंडर (Gas Agency godown Robbery) चोरल्याने संपूर्ण जिल्ह्यात खळबळ उडाली आहे. उटवद शिवारात असलेल्या आनंद भारत गॅस एजन्सीच्या गोडाऊनवर हा डल्ला मारण्यात आला असून, चोरट्यांनी लाखो रुपयांचा मुद्देमाल लंपास केला आहे.
नेमकी घटना काय? Gas Agency Godown Robbery
मिळालेल्या माहितीनुसार, रविवारी गॅस एजन्सी बंद असताना मध्यरात्रीच्या सुमारास ही धाडसी चोरी झाल्याची शक्यता वर्तवण्यात येत आहे. सोमवारी सकाळी जेव्हा एजन्सीचे कर्मचारी गोडाऊनवर पोहोचले, तेव्हा गोडाऊनचे कुलूप तुटलेले दिसले. आत जाऊन पाहिले असता मोठ्या प्रमाणात सिलिंडर गायब असल्याचे समोर आले. या घटनेमुळे परिसरात एकच धावपळ उडाली.
४.५१ लाखांचा मुद्देमाल चोरीला
चोरट्यांनी अत्यंत नियोजनबद्ध पद्धतीने ही चोरी (Gas Agency Godown Robbery) केली आहे. यामध्ये केवळ घरगुतीच नव्हे तर व्यावसायिक सिलिंडरवरही हात साफ करण्यात आला आहे. चोरीला गेलेल्या मालाचा तपशील खालीलप्रमाणे आहे:
- ९६ घरगुती गॅस सिलिंडर
- १२ निळ्या रंगाचे व्यावसायिक सिलिंडर
- ५ किलोचे दोन व्यावसायिक सिलिंडर
असे एकूण ११० सिलिंडर चोरट्यांनी पळवून नेले आहेत. या चोरीला गेलेल्या मुद्देमालाची अंदाजे किंमत ४ लाख ५१ हजार रुपये इतकी आहे.
पोलीस तपासाला वेग
Gas Agency godown Robbery या प्रकरणी आनंद भारत गॅस एजन्सीचे व्यवस्थापक सिद्धार्थ आढाव यांनी मौजपुरी पोलीस ठाण्यात रीतसर तक्रार दाखल केली आहे. पोलिसांनी अज्ञात चोरट्यांविरोधात गुन्हा दाखल केला असून, परिसरातील सीसीटीव्ही फुटेज आणि इतर पुराव्यांच्या आधारे तपास सुरू केला आहे. एवढ्या मोठ्या संख्येने सिलिंडर नेण्यासाठी चोरट्यांनी मोठ्या ट्रक किंवा मालवाहू वाहनाचा वापर केला असावा, असा संशय पोलिसांना आहे.
एकिकडे सर्वसामान्यांना गॅस टंचाईचा सामना करावा लागत असताना, दुसरीकडे अशा प्रकारे गॅस सिलिंडरची मोठी चोरी झाल्याने आश्चर्य आणि चिंता व्यक्त केली जात आहे.
