जालना (Jalna News): जालना शहरातून एक मोठी धक्कादायक बातमी समोर येत आहे. इनपुट टॅक्स क्रेडिट (ITC) ब्लॉक न करण्यासाठी तब्बल 60 हजार रुपयांची लाच स्वीकारताना राज्य कर अधिकारी (GST Officer) सुवर्णा रामेश्वर लोहिया आणि त्यांचा खाजगी कर सल्लागार अक्षय लोढा यांना लाचलुचपत प्रतिबंधक विभागाने (ACB) रंगेहात पकडले आहे. या धडक कारवाईमुळे जालना जिल्हा प्रशासनात आणि व्यापारी वर्गात प्रचंड खळबळ उडाली आहे.
काय आहे संपूर्ण प्रकरण? (Jalna ACB Trap Case Details)
मिळालेल्या माहितीनुसार, जालन्यातील एका स्थानिक इलेक्ट्रॉनिक्स व्यवसायिकाचे इनपुट टॅक्स क्रेडिट (ITC) ब्लॉक करण्यात आले होते. हे ब्लॉक केलेले क्रेडिट पुन्हा पूर्ववत (Unblock) करून देण्यासाठी आणि व्यवसायिकावर कोणतीही दंडात्मक कारवाई न करण्यासाठी 44 वर्षीय राज्य कर अधिकारी सुवर्णा लोहिया यांनी लाचेची मागणी केली होती.
या कामासाठी त्यांनी त्यांचा खाजगी कर सल्लागार अक्षय लोढा याच्या माध्यमातून तब्बल 60 हजार रुपयांची लाच मागितली. तक्रारदार व्यवसायिकाची लाच देण्याची इच्छा नसल्याने, त्यांनी थेट जालना लाचलुचपत प्रतिबंधक विभागाकडे (Jalna ACB) या प्रकरणी रीतसर तक्रार नोंदवली.
जीएसटी कार्यालयातच पडला दरोडा!
तक्रार प्राप्त झाल्यानंतर एसीबीच्या पथकाने २९ जुलै रोजी जीएसटी कार्यालयात सापळा रचला. सुवर्णा लोहिया यांच्या केबिनमध्येच व्यवसायिकाकडून 60 हजार रुपयांची लाच स्वीकारताना सल्लागार अक्षय लोढा आणि अधिकारी सुवर्णा लोहिया यांना पथकाने रंगेहात अटक केली. दोघांवरही भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू करण्यात आली आहे.
जालन्यात गुन्हेगारीच्या घटनांमुळे खळबळ
जालन्यात गेल्या काही दिवसांत घडलेल्या धक्कादायक घटनांमुळे संपूर्ण जिल्हा हादरला आहे. नुकतीच उघडकीस आलेली कोट्यवधी रुपयांची फसवणूक, एका हत्येची घटना आणि आता थेट वर्ग-१ च्या महिला अधिकाऱ्याला झालेली अटक, यामुळे शहरातील कायदा आणि सुव्यवस्थेवर चर्चा रंगू लागली आहे.
