Jalna News: जालना शहरासह जिल्ह्यात सध्या घरगुती गॅस सिलिंडरचा मोठा तुटवडा निर्माण झाला असून, याचा फायदा घेत काही समाजकंटकांनी गॅसचा काळाबाजार सुरू केला आहे. विशेष म्हणजे, व्यावसायिक गॅसचा पुरवठा विस्कळीत झाल्याने आता घरगुती सिलिंडर अव्वाच्या सव्वा दराने विकले जात असल्याचे धक्कादायक चित्र समोर आले आहे.
Black Market Emerges for LPG Cylinders in Jalna
मिळालेल्या माहितीनुसार, जालन्यात (LPG Cylinders in Jalna) घरगुती गॅस सिलिंडरसाठी नागरिकांना तासन्तास रांगा लावाव्या लागत आहेत. अधिकृत एजन्सींकडे गॅस बुक करूनही वेळेवर पुरवठा होत नसल्याने ग्राहकांची मोठी ओढाताण होत आहे. याच परिस्थितीचा फायदा घेत काही ठिकाणी १५०० रुपयांपर्यंत एका सिलिंडरची विक्री केली जात आहे. हॉटेल व्यावसायिक आणि छोट्या खाद्यविक्रेत्यांकडून घरगुती सिलिंडरचा अवैध वापर वाढल्याने ही कृत्रिम टंचाई निर्माण झाल्याची चर्चा आहे.
पुरवठा विभागाचे दुर्लक्ष?
नागरिकांना गॅस मिळवण्यासाठी एजन्सींच्या चकरा माराव्या लागत आहेत, तरीही पुरवठा विभागाकडून या काळाबाजारावर कोणतीही ठोस कारवाई होताना दिसत नाही. गॅस एजन्सींच्या गोडाऊनबाहेर रांगा लागलेल्या असताना, दुसरीकडे छुप्या पद्धतीने चढ्या दराने सिलिंडरची विक्री सुरू आहे. या प्रकारामुळे सर्वसामान्यांच्या खिशाला मोठी कात्री लागत असून संताप व्यक्त केला जात आहे.
काय आहेत मुख्य अडचणी?
- व्यावसायिक पुरवठ्यात अडथळा: कमर्शियल गॅस उपलब्ध नसल्याने हॉटेलमध्ये घरगुती गॅसचा वापर वाढला आहे.
- अव्वाच्या सव्वा दर: मूळ किमतीपेक्षा ५०० ते ६०० रुपये जादा देऊन गॅस घेण्याची वेळ ग्राहकांवर आली आहे.
- नियमन नाही: गॅस वितरणावर प्रशासनाचा अंकुश नसल्याने काळाबाजार करणाऱ्यांचे फावले आहे.
जालना जिल्ह्यातील गॅस ग्राहकांनी आता जिल्हाधिकाऱ्यांनी या प्रकरणी लक्ष घालून तात्काळ कारवाई करण्याची मागणी केली आहे. गॅस सिलिंडरचा हा काळाबाजार थांबणार की नागरिकांना अशीच लूट सोसावी लागणार, हा मोठा प्रश्न आहे.
